കേരള ക്രിക്കറ്റ് അസോസിയേഷൻ സംഘടിപ്പിക്കുന്ന പിങ്ക് ട്വന്റി 20 ചലഞ്ചേഴ്സ് വനിതാ ക്രിക്കറ്റ് ടൂർണമെൻ്റിൽ സാഫയറിനും ആംബറിനും വിജയം. ആദ്യ മൽസരത്തിൽ സാഫയർ എമറാൾഡിനെ നാല് വിക്കറ്റിന് തോൽപ്പിച്ചപ്പോൾ, രണ്ടാം മൽസരത്തിൽ റൂബിക്കെതിരെ 40 റൺസിനായിരുന്നു ആംബറിൻ്റെ വിജയം.
സാഫയറിനെതിരെ ആദ്യം ബാറ്റ് ചെയ്ത എമറാൾഡിന് 20 ഓവറിൽ ഏഴ് വിക്കറ്റ് നഷ്ടത്തിൽ 100 റൺസ് മാത്രമാണ് നേടാനായത്. ഓപണർ മാളവിക സാബുവും ക്യാപ്റ്റൻ നജ്ല നൗഷാദും മാത്രമാണ് എമറാൾഡ് ബാറ്റിങ് നിരയിൽ ഭേദപ്പെട്ട പ്രകടനം കാഴ്ചവച്ചത്. മാളവിക 26 റൺസും നജ്ല 21 റൺസുമെടുത്തു. സാഫയറിന് വേണ്ടി ഐശ്വര്യ എ കെ മൂന്നും അനശ്വര സന്തോഷ് രണ്ടും വിക്കറ്റുകൾ വീഴ്ത്തി.
മറുപടി ബാറ്റിങ്ങിന് ഇറങ്ങിയ സാഫയറിന് തുടരെ വിക്കറ്റുകൾ നഷ്ടമായെങ്കിലും മധ്യനിര ബാറ്റർ ഗോപികയുടെ തകർപ്പൻ ഇന്നിങ്സ് ടീമിന് വിജയമൊരുക്കി. 16 പന്തുകളിൽ രണ്ട് ഫോറും മൂന്ന് ഫോറുമടക്കം 35 റൺസുമായി പുറത്താകാതെ നിന്ന ഗോപികയാണ് പ്ലെയർ ഓഫ് ദി മാച്ചായും തെരഞ്ഞെടുക്കപ്പെട്ടത്. ഏഴ് പന്തുകൾ ബാക്കി നിൽക്കെയാണ് സാഫയർ ലക്ഷ്യത്തിലെത്തിയത്. എമറാൾഡിന് വേണ്ടി നജ്ല രണ്ട് വിക്കറ്റ് വീഴ്ത്തി.
രണ്ടാം മൽസരത്തിൽ ആംബർ 40 റൺസിനാണ് റൂബിയെ തോല്പിച്ചത്. ആദ്യം ബാറ്റ് ചെയ്ത ആംബർ 20 ഓവറിൽ അഞ്ച് വിക്കറ്റുമായി 125 റൺസെടുത്തു. ക്യാപ്റ്റൻ്റെ ഇന്നിങ്സുമായി കളം നിറഞ്ഞ സജന സജീവനും അൻസു സുനിലുമാണ് ആംബറിനെ മികച്ച സ്കോറിൽ എത്തിച്ചത്. സജന 39 പന്തുകളിൽ നിന്ന് 54 റൺസും അൻസു 52 പന്തുകളിൽ നിന്ന് 45 റൺസുമെടുത്തു. നാല് വിക്കറ്റ് വീഴ്ത്തിയ വിനയ സുരേന്ദ്രനാണ് റൂബി ബൗളിങ് നിരയിൽ തിളങ്ങിയത്.
മറുപടി ബാറ്റിങ്ങിൽ റൂബി ടീം ഓപണർ അഖില മാത്രമാണ് ഭേദപ്പെട്ട പ്രകടനം പുറത്തെടുത്തത്. അഖില 31 റൺസ് സംഭാവന ചെയ്തു. സൗരഭ്യ 18 റൺസെടുത്തു. മറ്റ് ബാറ്റർമാരിൽ ആർക്കും രണ്ടക്കം കടക്കാൻ കഴിയാതിരുന്നതോടെ ടീം റൂബിയുടെ മറുപടി എട്ട് വിക്കറ്റിന് 85 റൺസെന്ന നിലയിൽ അവസാനിച്ചു. ആംബറിന് വേണ്ടി അക്സ എ ആർ മൂന്നും ദർശന മോഹനൻ രണ്ടും വിക്കറ്റുകൾ വീഴ്ത്തി. സജന സജീവനാണ് കളിയിലെ താരമായി തെരഞ്ഞെടുക്കപ്പെട്ടത്.
Content Highlights: SAPPHIRE and AMBER won in KCA pink tournament